ਸ਼ੌਹਰਤ ਨਹੀਂ ਸਗੋਂ ਇਸ ਅਣਮੁੱਲੀ ਚੀਜ ਦੇ ਗੁਆਚਣ ਤੋਂ ਡਰਦੀ ਹੈ ਭਾਰਤੀ ਸਿੰਘ

ਮੁੰਬਈ (ਬਿਊਰੋ) — ਟੀ. ਵੀ. ਅਦਾਕਾਰਾ ਭਾਰਤੀ ਸਿੰਘ ਅੱਜ ਕਮੇਡੀ ਕਵੀਨ ਬਣ ਚੁੱਕੀ ਹੈ। ਭਾਰਤੀ ਸਿੰਘ ਨੇ 'ਲੱਲੀ' ਦੇ ਕਿਰਦਾਰ ਨਾਲ ਭਾਰਤੀ ਕਮੇਡੀ 'ਚ ਜਗ੍ਹਾ ਬਣਾਈ। ਭਾਰਤੀ ਸਿੰਘ ਆਪਣੀ ਕਮੇਡੀ ਨਾਲ ਪਿਛਲੇ ਲੰਮੇ ਸਮੇਂ ਤੋਂ ਛੋਟੇ ਪਰਦੇ ਛਾਈ ਹੋਈ ਹੈ। ਭਾਰਤੀ ਸਿੰਘ ਨੇ ਇਹ ਸਭ ਹਾਸਲ ਕਰਨ ਲਈ ਬਹੁਤ ਮਿਹਨਤ ਕੀਤੀ ਹੈ। ਇਸ ਸਭ ਦੇ ਚਲਦੇ ਭਾਰਤੀ ਸਿੰਘ ਦੀ ਇਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਕਾਫੀ ਵਾਇਰਲ ਹੋ ਰਹੀ ਹੈ।

ਇਹ ਵੀਡੀਓ ਉਨ੍ਹਾਂ ਦੇ ਕਿਸੇ ਪ੍ਰੋਗਰਾਮ ਦੀ ਹੈ, ਜਿਸ 'ਚ ਉਹ ਆਖ ਰਹੀ ਹੈ ''ਭਾਵੇਂ ਇਹ ਸਭ ਹਾਸਲ ਕਰਨ ਲਈ ਮੈਂ ਬਹੁਤ ਮਿਹਨਤ ਕੀਤੀ ਹੈ। ਇਹ ਸਾਰੀਆਂ ਚੀਜਾਂ ਮੇਰੇ ਕੋਲੋਂ ਰੱਬ ਭਾਵੇਂ ਵਾਪਸ ਲੈ ਲਵੇ ਮੈਨੂੰ ਕੋਈ ਮਲਾਲ ਨਹੀਂ ਹੋਵੇਗਾ ਪਰ ਮੇਰੀ ਮਾਂ ਮੇਰੇ ਤੋਂ ਕਦੇ ਵੀ ਦੂਰ ਨਾ ਹੋਵੇ।

ਭਾਰਤੀ ਕਹਿੰਦੀ ਹੈ ਕਿ ਇਹ ਚੀਜਾਂ ਉਹ ਆਪਣੀ ਮਿਹਨਤ ਨਾਲ ਫਿਰ ਹਾਸਲ ਕਰ ਲਵੇਗੀ ਜੇ ਮਾਂ ਉਸ ਤੋਂ ਦੂਰ ਹੋ ਗਈ ਤਾਂ ਉਹ ਮਾਂ ਨੂੰ ਹਾਸਲ ਨਹੀਂ ਕਰ ਸਕਦੀ।''

ਦੱਸਣਯੋਗ ਹੈ ਕਿ ਭਾਰਤੀ ਸਿੰਘ ਦੀ ਇਹ ਵੀਡੀਓ ਬਹੁਤ ਹੀ ਭਾਵੁਕ ਹੈ। ਭਾਰਤੀ ਸਿੰਘ ਦੇ ਪਿਤਾ ਇਕ ਨੇਪਾਲੀ ਪਰਿਵਾਰ ਨਾਲ ਸਬੰਧ ਰੱਖਦੇ ਸਨ ਜਦੋਂ ਕਿ ਭਾਰਤੀ ਦੀ ਮਾਂ ਪੰਜਾਬੀ ਪਰਿਵਾਰ ਨਾਲ ਸਬੰਧ ਰੱਖਦੀ ਹੈ। ਭਾਰਤੀ ਸਿੰਘ ਤਿੰਨ ਭੈਣ ਭਰਾ ਹਨ ਤੇ ਭਾਰਤੀ ਪਰਿਵਾਰ ਦੀ ਸਭ ਤੋਂ ਛੋਟੀ ਮੈਂਬਰ ਹੈ। ਭਾਰਤੀ ਦੇ ਜਨਮ ਦੇ ਦੋ ਸਾਲ ਬਾਅਦ ਹੀ ਉਸ ਦੇ ਪਿਤਾ ਦੀ ਮੌਤ ਹੋ ਗਈ ਸੀ। ਇਸ ਕਰਕੇ ਪੂਰੇ ਪਰਿਵਾਰ ਨੂੰ ਭਾਰਤੀ ਦੀ ਮਾਂ ਨੇ ਹੀ ਪਾਲਿਆ ਸੀ।