ਪਹਿਲਾਂ ਹੋਈਆਂ ਖੂਬ ਲੜਾਈਆਂ, ਫਿਰ ਇੰਝ ਕੁੜਮ ਬਣੇ ਦਲੇਰ ਮਹਿੰਦੀ ਤੇ ਹੰਸ ਰਾਜ ਹੰਸ

ਨਵੀਂ ਦਿੱਲੀ (ਬਿਊਰੋ) — ਮਸ਼ਹੂਰ ਕਾਮੇਡੀਅਨ ਕਪਿਲ ਸ਼ਰਮਾ ਦੇ 'ਦਿ ਕਪਿਲ ਸ਼ਰਮਾ ਸ਼ੋਅ' 'ਚ ਐਤਵਾਰ ਰਾਤ ਸੰਗੀਤ ਦੀ ਦੁਨੀਆ ਦੇ ਬਾਦਸ਼ਾਹ ਪੰਜਾਬੀ ਗਾਇਕ ਹੰਸ ਰਾਜ ਹੰਸ ਅਤੇ ਦਲੇਰ ਮਹਿੰਦੀ ਨੇ ਸ਼ਿਰਕਤ ਕੀਤੀ। ਉਨ੍ਹਾਂ ਨਾਲ ਗਾਇਕ ਮੀਕਾ ਸਿੰਘ ਤੇ ਜਸਬੀਰ ਜੱਸੀ ਵੀ ਪਹੁੰਚੇ ਸਨ।

ਸੰਗੀਤਕਾਰਾਂ ਨਾਲ ਸਜੇ ਸ਼ੋਅ 'ਚ ਸੰਗੀਤ ਦੀ ਖੂਬਸੂਰਤ ਮਹਿਫਲ ਸਜੀ। ਇਸ ਦੌਰਾਨ ਕਪਿਲ ਸ਼ਰਮਾ ਨੇ ਕਿਹਾ ਹੰਸ ਰਾਜ ਹੰਸ ਤੇ ਦਲੇਰ ਮਹਿੰਦੀ ਜੀ ਸੰਗੀਤ ਦੀ ਦੁਨੀਆ ਦੇ ਬਾਦਸ਼ਾਹ ਹਨ ਪਰ ਦੋਵੇਂ ਕੁੜਮ ਵੀ ਹਨ ਪਰ ਇਹ ਰਿਸ਼ਤੇਦਾਰੀ ਕਿਵੇਂ ਬਣੀ? ਇਸ ਦੇ ਪਿੱਛੇ ਦੀ ਦਿਲਸਚਪ ਕਹਾਣੀ ਕੀ ਹੈ?

ਕਪਿਲ ਦੇ ਸਵਾਲ ਨੂੰ ਸੁਣ ਕੇ ਪਹਿਲਾਂ ਤਾਂ ਦਲੇਰ ਮਹਿੰਦੀ ਨੇ ਕਿਹਾ, ''ਮੈਂ ਹੰਸ ਰਾਜ ਹੰਸ ਜੀ ਦਾ ਬਹੁਤ ਵੱਡਾ ਫੈਨ ਰਿਹਾ ਹਾਂ। ਇਨ੍ਹਾਂ ਦੇ ਸ਼ੋਅ ਦੇਖਣ ਲਈ ਬਹੁਤ ਧੱਕੇ ਖਾਂਦੇ ਹਨ। ਅਸੀਂ ਰਿਸ਼ਤੇਦਾਰ ਬਣ ਗਏ, ਇਸ ਦੇ ਪਿੱਛੇ ਹੰਸ ਰਾਜ ਹੰਸ ਜੀ ਦੀ ਮਹਿਰਬਾਨੀ ਹੈ ਕਿ ਮੈਂ  ਇਨ੍ਹਾਂ ਅੱਗੇ ਆ ਕੇ ਬੇਨਤੀ ਕੀਤੀ ਅਤੇ ਇਨ੍ਹਾਂ ਨੇ ਸੁਣ ਲਈ।''

ਦਲੇਰ ਮਹਿੰਦੀ ਨੇ ਕਿਹਾ, ''ਮੇਰੀ ਬੇਟੀ ਅਜੀਤ ਕੌਰ ਮਹਿੰਦੀ ਨੇ ਕਿਹਾ, ਮੇਰਾ ਵਿਆਹ ਕਰ ਦਿਓ, ਇਸ 'ਤੇ ਮੈਂ ਕਿਹਾ, ਕਿਸ ਨਾਲ ਕਰਨਾ ਹੈ? ਉਹ ਬੋਲੀ ਜਿੱਥੇ ਤੁਸੀਂ ਚਾਹੋ। ਇਸ ਤੋਂ ਬਾਅਦ ਮੈਂ ਹੰਸ ਜੀ ਕੋਲ ਗਿਆ ਤੇ ਸਾਰੀ ਗੱਲ ਵਿਸਥਾਰ ਨਾਲ ਦਸੀ। ਉਨ੍ਹਾਂ ਨੇ ਮੇਰੀ ਗੱਲ ਧਿਆਨ ਨਾਲ ਸੁਣੀ ਤੇ ਆਪਣੇ ਬੇਟੇ ਨਾਲ ਮੇਰੀ ਧੀ ਦਾ ਰਿਸ਼ਤਾ ਪੱਕਾ ਕਰ ਦਿੱਤਾ। ਬੱਸ ਫਿਰ ਕੀ ਅਸੀਂ ਦੋਵੇਂ ਕੁੜਮ ਬਣ ਗਏ।''

ਦਲੇਰ ਮਹਿੰਦੀ ਦੀ ਗੱਲ ਸੁਣ ਕੇ ਹੰਸ ਰਾਜ ਹੰਸ ਜੀ ਨੇ ਕਿਹਾ, ''ਇਸ 'ਚ ਥੋੜਾ ਬਦਲਾਅ ਕਰਦਾ ਚਾਵਾਂਗਾ ਕਿ ਰਿਸ਼ਤੇ ਦੀ ਅਰਜੀ ਪਹਿਲਾਂ ਦਲੇਰ ਮਹਿੰਦੀ ਨੇ ਨਹੀਂ ਸਗੋਂ ਮੈਂ ਦਿੱਤੀ ਸੀ। ਮੈਨੂੰ ਅਜੀਤ ਕੌਰ ਨਾਂ ਦੀ ਪਰੀ ਮਿਲ ਗਈ ਹੈ। ਉਹ ਮੇਰੀ ਬੇਟੀ ਹੈ।''

ਦੱਸ ਦਈਏ ਕਿ ਹੰਸ ਰਾਜ ਹੰਸ ਦੇ ਬੇਟੇ ਨਵਰਾਜ ਹੰਸ ਤੇ ਦਲੇਰ ਮਹਿੰਦੀ ਦੀ ਧੀ ਅਜੀਤ ਕੌਰ ਨੇ ਸਾਲ 2017 'ਚ ਵਿਆਹ ਕਰਵਾਇਆ ਸੀ। ਹੰਸ ਰਾਜ ਹੰਸ ਤੇ ਦਲੇਰ ਮਹਿੰਦੀ ਦੇ ਇਸ ਕਿੱਸੇ 'ਚ ਅਸਲੀ ਮੋੜ ਮੀਕਾ ਸਿੰਘ ਲੈ ਕੇ ਆਏ। ਉਨ੍ਹਾਂ ਨੇ ਕਿਹਾ, ''ਤੁਸੀਂ ਲੋਕਾਂ ਨੇ ਜਿਹੜਾ ਕਿੱਸਾ ਕੁੜਮ ਬਣਨ ਦਾ ਸੁਣਾਇਆ ਹੈ ਉਹ ਸੱਚ ਹੈ ਪਰ ਇਸ ਤੋਂ ਪਹਿਲਾਂ ਦੋਵਾਂ 'ਚ ਕਾਫੀ ਲੜਾਈਆਂ ਹੋਈਆਂ ਸਨ। ਇਹ ਕਿੱਸਾ ਮੈਂ ਸੁਣਾਉਂਦਾ ਹਾਂ।''

ਮੀਕਾ ਨੇ ਦੱਸਿਆ, ''ਇਕ ਵਾਰ ਹੰਸ ਰਾਜ ਹੰਸ ਤੇ ਦਲੇਰ ਮਹਿੰਦੀ ਜੀ ਦੋਵੇਂ ਸ਼ੋਅ ਕਰ ਰਹੇ ਸਨ। ਸਾਡੇ ਵੱਡੇ ਭਰਾ ਦਲੇਰ ਪਾਜੀ ਨੇ ਹੰਸ ਜੀ ਨੂੰ ਸ਼ੋਅ ਦੇ ਖਤਮ ਹੋਣ 'ਤੇ ਕਿਹਾ, ਤੁਹਾਡਾ ਧੰਨਵਾਦ। ਇਹ ਸ਼ੋਅ ਆਰਾਮ ਨਾਲ ਖਤਮ ਹੋ ਗਿਆ ਪਰ ਸ਼ੋਅ ਤੋਂ ਬਾਅਦ ਹੰਸ ਜੀ ਕੋਲ ਅੱਗ ਲਾਉਣ ਪਹੁੰਚੇ ਜਸਬੀਰ ਜੱਸੀ। ਇਨ੍ਹਾਂ ਨੇ ਹੰਸ ਰਾਜ ਹੰਸ ਨੂੰ ਕਿਹਾ, ਦਲੇਰ ਜੀ ਨੇ ਤੁਹਾਨੂੰ ਸੀਨੀਅਰ ਆਖ ਕੇ ਬੁੱਢਾ ਕਿਹਾ ਹੈ। ਇਸ ਤੋਂ ਬਾਅਦ ਦਲੇਰ ਤੇ ਹੰਸ ਜੀ ਖਟਾਸ ਆਈ। ਹੰਸ ਜੀ ਨੇ ਫੋਨ ਕਰਕੇ ਦਲੇਰ ਪਾਜੀ ਨੂੰ ਬਹੁਤ ਖਰੀਆਂ-ਖੋਟੀਆਂ ਸੁਣਾਈਆਂ।'' 

ਮੀਕਾ ਸਿੰਘ ਨੇ ਦੱਸਿਆ, ''ਇਹ ਸੁਣਨ ਤੋਂ ਬਾਅਦ ਦਲੇਰ ਭਾਜੀ ਤੇ ਹੰਸ ਰਾਜ ਹੰਸ ਜੀ 'ਚ ਕਾਫੀ ਲੜਾਈ ਹੋਈ। ਮੀਕਾ ਨੇ ਕਿਹਾ, ਦੋਵਾਂ ਦੀ ਲੜਾਈ ਦੀ ਵਜ੍ਹਾ ਜਾਣ ਲਈ ਮੈਂ ਹੰਸ ਜੀ ਨੂੰ ਫੋਨ ਲਾਇਆ, ਮੈਂ ਫੋਨ 'ਤੇ ਸਵਾਲ ਕੀਤਾ, ਕੀ ਜੱਸੀ ਆਇਆ ਸੀ ਤੁਹਾਡੇ ਕੋਲ। ਹੰਸ ਜੀ ਬੋਲੇ ਹਾਂ। ਬੱਸ ਇਹ ਸੁਣਦੇ ਹੀ ਸਮਝ ਆ ਗਈ ਕਿ ਇਨ੍ਹਾਂ 'ਚ ਅੱਗ ਲਾਉਣ ਵਾਲਾ ਜਸਬੀਰ ਜੱਸੀ ਹੀ ਹੈ। ਇਹ ਉਸ ਦਾ ਹੀ ਕੰਮ ਹੈ।'' ਇਸ ਤੋਂ ਬਾਅਦ ਮੀਕਾ ਨੇ ਦੱਸਿਆ ਕਿ ਲੜਾਈ ਕਰਵਾਉਣ ਤੋਂ ਬਾਅਦ ਜਸਬੀਰ ਜੱਸੀ ਜਲੰਧਰ ਤੋਂ ਦਿੱਲੀ ਭੱਜ ਗਿਆ ਪਰ ਹੰਸ ਜੀ ਤੇ ਦਲੇਰ ਭਾਜੀ ਨੇ ਇਕੱਠੇ ਬੈਠ ਕੇ ਗੱਲ ਨੂੰ ਸੁਲਝਾ ਲਿਆ, ਜਿਸ ਤੋਂ ਬਾਅਦ ਇਨ੍ਹਾਂ ਦਾ ਰਿਸ਼ਤਾ ਹੋਰ ਵੀ ਮਜ਼ਬੂਤ ਬਣ ਗਿਆ।''