Bday Spl : ਅਦਾਕਾਰੀ ਤੋਂ ਇਲਾਵਾ ਮਾਡਲਿੰਗ ''ਚ ਵੀ ਇਹਾਨਾ ਢਿੱਲੋਂ ਨੇ ਕੀਤੀ ਹੈ ਸ਼ੌਹਰਤ ਹਾਸਲ
8/18/2017 2:39:41 PM
ਜਲੰਧਰ— ਪੰਜਾਬੀ ਫਿਲਮ 'ਡੈਡੀ ਕੂਲ ਮੁੰਡੇ ਫੂਲ' ਨਾਲ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕਰਨ ਵਾਲੀ ਪਾਲੀਵੁੱਡ ਅਦਾਕਾਰਾ ਇਹਾਨਾ ਢਿੱਲੋਂ ਦਾ ਅੱਜ ਜਨਮਦਿਨ ਹੈ। ਉਨ੍ਹਾਂ ਦਾ ਜਨਮ 18 ਅਗਸਤ ਨੂੰ ਹੋਇਆ ਸੀ। ਇਹਾਨਾ ਪਿਛਲੇ ਕੁਝ ਸਾਲਾਂ ਤੋਂ ਪੰਜਾਬੀ ਫ਼ਿਲਮ ਇੰਡਸਟਰੀ ਵਿਚ ਸਰਗਰਮ ਹੈ।
ਉਹ ਭਾਰਤੀ ਫੈਸ਼ਨ ਇੰਡਸਟਰੀ ਦਾ ਚਰਚਿਤ ਚਿਹਰਾ ਹੈ। ਪੰਜਾਬ ਦੀ ਜੰਮਪਲ ਤੇ ਨਿਊਯਾਰਕ ਦੀ ਪੜ੍ਹੀ ਲਿਖੀ ਇਹ ਮੁਟਿਆਰ ਪਿਛਲੇ ਕਈ ਸਾਲਾਂ ਤੋਂ ਮੁੰਬਈ ਵਿਚ ਸਰਗਰਮ ਹੈ।
ਇਹਾਨਾ ਨੇ ਮਾਡਲਿੰਗ ਦੇ ਖੇਤਰ ਤੋਂ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਇਸ ਮਗਰੋਂ ਉਹ ਮੁੜ ਫੈਸ਼ਨ ਜਗਤ ਵਿਚ ਸਰਗਰਮ ਹੋ ਗਈ। ਹੁਣ ਉਹ ਮੁੜ ਪੰਜਾਬੀ ਸਿਨਮਾ ਨਾਲ ਜੁੜੀ ਹੈ।
ਜਾਣਕਾਰੀ ਮੁਤਾਬਕ ਇਹਾਨਾ ਦਾ ਬਚਪਨ ਫ਼ਰੀਦਕੋਟ ਦੇ ਛੋਟੇ ਜਿਹੇ ਪਿੰਡ ਦਬੜੀਖਾਨਾ ਵਿਚ ਗੁਜਰਿਆ ਹੈ। ਪੰਜਾਬ ਦੇ ਜੱਟ ਪਰਿਵਾਰ ਨਾਲ ਸਬੰਧਿਤ ਇਹਾਨਾ ਆਪਣੇ ਪਿਤਾ ਸੁਰਿੰਦਰਪਾਲ ਸਿੰਘ ਢਿੱਲੋਂ ਅਤੇ ਮਾਤਾ ਬਲਜੀਤ ਕੌਰ ਦੀ ਛੋਟੀ ਲਾਡਲੀ ਧੀ ਹੈ।
ਉਸ ਦੇ ਪਰਿਵਾਰ ਦੀ ਰਹਿਣੀ-ਬਹਿਣੀ ਮੁੱਢ ਤੋਂ ਹੀ ਸ਼ਾਹੀ ਰਹੀ ਹੈ। ਪਰਿਵਾਰ ਨੇ ਉਸ ਦੇ ਸ਼ੌਕ 'ਤੇ ਕਦੇ ਇਤਰਾਜ਼ ਨਹੀਂ ਕੀਤਾ, ਸਗੋਂ ਮਾਡਲਿੰਗ ਦੇ ਖੇਤਰ 'ਚ ਅੱਗੇ ਵਧਣ ਲਈ ਪੂਰੀ ਮਦਦ ਕੀਤੀ।
ਚੰਡੀਗੜ੍ਹ ਕਾਲਜ 'ਚ ਪੜ੍ਹਦਿਆਂ ਹੀ ਉਸ ਨੂੰ ਮਾਡਲਿੰਗ ਦਾ ਸ਼ੌਕ ਪਿਆ। ਸਾਥੀ ਵਿਦਿਆਰਥੀਆਂ ਤੇ ਅਧਿਆਪਕਾਂ ਦੇ ਉਤਸ਼ਾਹਿਤ ਕਰਨ 'ਤੇ ਉਸ ਅੰਦਰ ਇਸ ਖੇਤਰ 'ਚ ਆਉਣ ਦਾ ਜਜ਼ਬਾ ਪੈਦਾ ਹੋਇਆ। ਗ੍ਰੈਜੂਏਸ਼ਨ ਤੋਂ ਬਾਅਦ ਉਹ 2009 'ਚ ਨਿਊਯਾਰਕ ਚਲੀ ਗਈ ਜਿੱਥੇ ਉਸਨੇ ਪੜ੍ਹਾਈ ਦੇ ਨਾਲ ਨਾਲ ਮਾਡਲਿੰਗ ਸ਼ੁਰੂ ਕਰ ਦਿੱਤੀ।
ਉੱਥੇ ਥੋੜ੍ਹੇ ਹੀ ਸਮੇਂ ਵਿੱਚ ਉਸਨੇ ਫੈਸ਼ਨ ਸ਼ੋਅ, ਰੈਂਪ ਸ਼ੋਅ, ਐਡ ਫਿਲਮਾਂ ਕਰਕੇ ਮਾਡਲਿੰਗ ਦੇ ਖੇਤਰ ਵਿੱਚ ਆਪਣਾ ਨਾਮ ਸਥਾਪਿਤ ਕਰ ਲਿਆ। ਇਹਾਨਾ ਸੰਸਾਰ ਭਰ ਦੀਆਂ ਨਾਮਵਰ ਕੰਪਨੀਆਂ ਲਈ ਐਡ ਫਿਲਮਾਂ ਕਰ ਚੁੱਕੀ ਹੈ। 2012 ਵਿਚ ਉਹ ਵਾਪਸ ਭਾਰਤ ਆ ਗਈ। ਹੁਣ ਉਸ ਦਾ ਮਨ ਫ਼ਿਲਮੀ ਕਰੀਅਰ ਤਲਾਸ਼ ਰਿਹਾ ਸੀ।
ਇਸ ਲਈ ਉਸ ਨੇ ਐਕਟਿੰਗ ਦੀਆਂ ਬਾਰੀਕੀਆਂ ਸਿੱਖਣ ਲਈ ਬੈਰੀ ਜੋਹਨ ਦੇ ਐਕਟਿੰਗ ਸਕੂਲ ਤੋਂ ਐਕਟਿੰਗ ਦੀ ਟ੍ਰੇਨਿੰਗ ਲਈ।ਐਕਟਿੰਗ ਕੋਰਸ ਤੋਂ ਬਾਅਦ ਉਹ ਪੰਜਾਬ ਆਈ ਤਾਂ ਇਸ ਦੌਰਾਨ ਉਸ ਨੂੰ ਨਿਰਦੇਸ਼ਕ ਸਿਮਰਜੀਤ ਸਿੰਘ ਦੀ ਫ਼ਿਲਮ 'ਡੈਡੀ ਕੂਲ ਮੁੰਡੇ ਫੂਲ' ਮਿਲ ਗਈ ਜਿਸ 'ਚ ਉਸ ਨੇ ਅਮਰਿੰਦਰ ਗਿੱਲ ਤੇ ਹਰੀਸ਼ ਵਰਮਾ ਨਾਲ ਅਹਿਮ ਭੂਮਿਕਾ ਨਿਭਾਈ।
ਇਸ ਫ਼ਿਲਮ ਤੋਂ ਬਾਅਦ ਉਸ ਦੀ ਦੂਜੀ ਪੰਜਾਬੀ ਫ਼ਿਲਮ 'ਟਾਈਗਰ' ਸੀ ਜਿਸ 'ਚ ਉਸ ਨੇ ਪੰਜਾਬੀ ਗਾਇਕ ਸਿੱਪੀ ਗਿੱਲ ਨਾਲ ਬਤੌਰ ਹੀਰੋਇਨ ਕੰਮ ਕੀਤਾ। ਲੰਘੇ ਸਾਲ ਆਈ ਇਸ ਫ਼ਿਲਮ ਨਾਲ ਉਸ ਦੀ ਕਾਫ਼ੀ ਚਰਚਾ ਹੋਈ।
ਆਪਣੇ ਭਾਈਚਾਰੇ ਚੋ ਆਪਣੇ ਜੀਵਨਸਾਥੀ ਦੀ ਚੋਣ ਕਰੋ - ਮੁਫ਼ਤ ਰਿਜਿਸਟ੍ਰੇਸ਼ਨ ਕਰੇ
