ਅਜਿਹੇ ਝਮੇਲਿਆਂ ਕਾਰਨ ਕੰਵਰ ਗਰੇਵਾਲ ਨੇ ਛੱਡੀ ਸੀ ਯੂਨੀਵਰਸਿਟੀ ਦੀ ਨੌਕਰੀ

ਜਲੰਧਰ (ਬਿਊਰੋ) — 'ਨਾ ਜਾਈ ਮਸਤਾਂ ਦੇ ਵਿਹੜੇ ਨੀ ਮਸਤ ਬਣਾ ਦੇਣਗੇ ਬੀਬਾ' ਨਾਲ ਪੰਜਾਬੀ ਮਿਊਜ਼ਿਕ ਇੰਡਸਟਰੀ 'ਚ ਵੱਖਰੀ ਪਛਾਣ ਬਣਾਉਣ ਵਾਲੇ ਕੰਵਰ ਗਰੇਵਾਲ ਹਮੇਸ਼ਾ ਹੀ ਆਪਣੇ ਗੀਤਾਂ 'ਚ ਇਸ਼ਕ ਮਿਜਾਜ਼ੀ ਦੇ ਨਾਲ-ਨਾਲ ਇਸ਼ਕ ਹਕੀਕੀ ਦੀ ਗੱਲ ਕਰਦੇ ਹਨ। ਆਪਣੇ ਗੀਤਾਂ ਨਾਲ ਸਰੋਤਿਆਂ ਨੂੰ ਰੱਬ ਦੀ ਇਬਾਦਤ ਕਰਵਾਉਣ ਵਾਲੇ ਇਸ ਫੱਕਰ ਕਲਾਕਾਰ ਦਾ ਜਨਮ ਬਠਿੰਡਾ 'ਚ ਹੋਇਆ।

ਦੋ ਸਾਲ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ 'ਚ ਕੀਤੀ ਨੌਕਰੀ

ਦੱਸ ਦਈਏ ਕਿ ਅੱੈਮ. ਏ. ਦੀ ਪੜ੍ਹਾਈ ਕਰਨ ਤੋਂ ਬਾਅਦ ਕੰਵਰ ਗਰੇਵਾਲ ਨੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ 'ਚ ਦੋ ਸਾਲ ਨੌਕਰੀ ਕੀਤੀ ਹੈ। ਕੰਵਰ ਗਰੇਵਾਲ ਨੇ ਯੂਨੀਵਰਸਿਟੀ 'ਚ ਮਿਊਜ਼ਿਕ ਡਾਇਰੈਕਟਰ ਦੀ ਨੌਕਰੀ ਇਸ ਲਈ ਛੱਡ ਦਿੱਤੀ ਕਿਉਂਕਿ ਉਹ ਦੁਨੀਆ ਦੇ ਝਮੇਲਿਆਂ ਤੋਂ ਦੂਰ ਰਹਿਣਾ ਚਾਹੁੰਦਾ ਸਨ।

 ਕੰਵਰ ਗਰੇਵਾਲ ਦੇ ਮਿਊਜ਼ਿਕ ਕਰੀਅਰ ਦੀ ਗੱਲ ਕੀਤੀ ਜਾਵੇ ਤਾਂ ਕੰਵਰ ਨੂੰ ਛੋਟੇ ਹੁੰਦੇ ਹੀ ਗਾਉਣ ਦਾ ਸ਼ੌਂਕ ਸੀ ਪਰ ਮਿਊਜ਼ਿਕ ਦੇ ਖੇਤਰ 'ਚ ਕੰਵਰ ਗਰੇਵਾਲ ਦਾ ਦੋਸਤ ਕੁਲਵਿੰਦਰ ਸਿੰਘ ਲੈ ਕੇ ਆਇਆ ਸੀ ।

ਗਾਇਕ ਦੇ ਨਾਲ-ਨਾਲ ਚੰਗੇ ਸਾਜ਼ੀ ਵੀ ਹਨ

ਕੰਵਰ ਗਰੇਵਾਲ ਦਾ ਪਹਿਲਾ ਗੀਤ 'ਮਾਫ ਕਰੀ ਰੋਣਾ ਸੀ' ਹੈ। ਇਸ ਤੋਂ ਬਾਅਦ ਕੰਵਰ ਗਰੇਵਾਲ ਨੇ 'ਅੱਖੀਆਂ' ਅਤੇ 'ਛੱਲਾ' ਗੀਤ ਕੱਢਿਆ, ਜੋ ਸਰੋਤਿਆਂ ਦੀ ਪਸੰਦ 'ਤੇ ਖਰੇ ਉਤਰੇ। ਦੱਸ ਦਈਏ ਕਿ ਕੰਵਰ ਗਰੇਵਾਲ ਜਿੰਨੇ ਵਧੀਆ ਗਾਇਕ ਹਨ, ਉਨ੍ਹਾਂ ਹੀ ਵਧੀਆ ਸਾਜ਼ੀ ਵੀ ਹਨ।

ਉਨ੍ਹਾਂ ਨੇ ਹਾਰਮੋਨੀਅਮ ਵਜਾਉਣ ਦੇ ਗੁਣ ਗੁਰਜੰਟ ਸਿੰਘ ਕਲਿਆਣ ਤੋਂ ਸਿੱਖੇ ਹਨ ਜਦੋਂ ਕਿ ਗਾਉਣਾ ਉਨ੍ਹਾਂ ਨੇ ਸਕੂਲੀ ਸਮੇਂ 'ਚ ਰਵੀ ਸ਼ਰਮਾ ਤਂੋ ਸਿੱਖਿਆ ਸੀ ਅਤੇ ਕਾਲਜ ਦੇ ਦਿਨਾਂ 'ਚ ਵਿਜੇ ਕੁਮਾਰ ਸੱਚਦੇਵਾ ਕੋਲੋਂ ਮਿਊਜ਼ਿਕ ਦੀ ਸਿੱਖਿਆ ਹਾਸਲ ਕੀਤੀ ਸੀ।

ਨੌਵੀਂ ਕਲਾਸ ਦੌਰਾਨ ਲਾਇਆ ਸੀ ਵਿਆਹ 'ਚ ਪਹਿਲਾ ਅਖਾੜਾ

ਦੱਸਣਯੋਗ ਹੈ ਕਿ ਕੰਵਰ ਗਰੇਵਾਲ ਨੇ ਨੌਵੀਂ ਜਮਾਤ 'ਚ ਪੜਦਿਆ ਹੀ ਆਪਣੇ ਇਕ ਦੋਸਤ ਦੇ ਵਿਆਹ 'ਤੇ ਅਖਾੜਾ ਲਾਇਆ ਸੀ ਤੇ ਅੱਜ ਉਨ੍ਹਾਂ ਦੇ ਅਖਾੜਿਆਂ 'ਚ ਲੱਖਾਂ ਲੋਕਾਂ ਦੀ ਭੀੜ ਜੁੱਟ ਦੀ ਹੈ।