ਥੱਪੜ ਮਾਰ ਕੇ ਅਤੇ ਖਾ ਕੇ ਖੂਬ ਸੁਰਖੀਆਂ ਬਟੋਰ ਚੁੱਕੇ ਹਨ ਬਾਲੀਵੁੱਡ ਦੇ ਇਹ ਸਟਾਰਜ਼

ਮੁੰਬਈ (ਬਿਊਰੋ)— ਬਾਲੀਵੁੱਡ 'ਚ ਆਏ ਦਿਨ ਕਿਸੇ ਨਾ ਕਿਸੇ ਸਟਾਰਜ਼ ਜਾਂ ਮੁੱਦੇ ਨੂੰ ਲੈ ਕੇ ਚਰਚਾ ਛਿੜੀ ਰਹਿੰਦੀ ਹੈ। ਕਿਸੇ ਦੇ ਬ੍ਰੇਕਅੱਪ ਦੀਆਂ ਖਬਰਾਂ ਤਾਂ ਕਿਸੇ ਦੇ ਅਫੇਅਰ ਦੀ ਚਰਚਾ ਫਿਲਮੀ ਦੁਨੀਆ 'ਚ ਆਮ ਹੀ ਚੱਲਦੀ ਰਹਿੰਦੀ ਹੈ ਪਰ ਇਸ ਤੋਂ ਇਲਾਵਾ ਫਿਲਮ ਜਗਤ ਕੰਟਰੋਵਰਸੀ ਨੂੰ ਲੈ ਕੇ ਵੀ ਖਬਰਾਂ 'ਚ ਬਣਿਆ ਰਹਿੰਦਾ ਹੈ। ਅਜਿਹੇ 'ਚ ਗੱਲ ਕਰਾਂਗੇ, ਉਨ੍ਹਾਂ ਸਟਾਰਜ਼ ਦੀ, ਜੋ ਥੱਪੜ ਮਾਰਨ ਅਤੇ ਖਾਣ ਕਾਰਨ ਸੁਰਖੀਆਂ 'ਚ ਰਹਿ ਚੁੱਕੇ ਹਨ।

ਇਸ ਸੂਚੀ 'ਚ ਸਭ ਤੋਂ ਪਹਿਲਾਂ ਨਾਂ ਗੋਵਿੰਦਾ ਦਾ ਆਉਂਦਾ ਹੈ। ਡਾਂਸ ਦੇ ਬਾਦਸ਼ਾਹ ਗੋਵਿੰਦਾ ਨੇ ਆਪਣੇ ਫਿਲਮੀ ਕਰੀਅਰ 'ਚ ਇਕ ਤੋਂ ਵੱਧ ਕੇ ਇਕ ਹਿੱਟ ਫਿਲਮਾਂ ਦਿੱਤੀਆਂ ਹਨ। ਇਕ ਵਾਰ ਇਕ ਰਿਪੋਰਟਰ ਨੂੰ ਥੱਪੜ ਮਾਰਨ ਕਾਰਨ ਗੋਵਿੰਦਾ ਮੀਡੀਆ ਦੇ ਕੈਮਰੇ 'ਚ ਕੈਦ ਹੋ ਗਏ ਸਨ। ਇਸ ਹਾਦਸੇ ਤੋਂ ਬਾਅਦ ਗੋਵਿੰਦਾ ਦਾ ਕਹਿਣਾ ਸੀ ਕਿ ਰਿਪੋਰਟਰ ਦੇ ਬੁਰੇ ਵਿਵਹਾਰ ਕਾਰਨ ਉਨ੍ਹਾਂ ਨੂੰ ਅਜਿਹਾ ਕਰਨਾ ਪਿਆ।

ਬਾਲੀਵੁੱਡ ਦੀ ਮੋਸਟ ਵਿਵਾਦਿਤ ਕੁਈਨ ਰਾਖੀ ਸਾਵੰਤ ਤੋਂ ਹਰ ਕੋਈ ਜਾਣੂ ਹੈ। ਰਾਖੀ ਆਪਣੇ ਬੇਬਾਕ ਅੰਦਾਜ਼ ਲਈ ਹਮੇਸ਼ਾ ਚਰਚਾ 'ਚ ਰਹਿੰਦੀ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਇਕ ਵਾਰ ਉਨ੍ਹਾਂ ਨੇ ਆਪਣੇ ਸਾਬਕਾ ਬੁਆਏਫ੍ਰੈਂਡ ਨੂੰ ਥੱਪੜ ਮਾਰ ਦਿੱਤਾ ਸੀ, ਜਿਸ ਤੋਂ ਬਾਅਦ ਉਹ ਸੁਰਖੀਆਂ 'ਚ ਲਗਾਤਾਰ ਬਣੀ ਰਹੀ। ਇਸ ਤੋਂ ਇਲਾਵਾ ਰਾਖੀ ਨੇ ਸਟੇਜ 'ਤੇ ਇਕ ਮੈਨੇਜਰ ਦੇ ਵੀ ਥੱਪੜ ਮਾਰ ਦਿੱਤਾ ਸੀ।

ਟੀ. ਵੀ. ਅਦਾਕਾਰਾ ਸ਼ਵੇਤਾ ਤਿਵਾਰੀ ਦੇ ਸਾਬਕਾ ਪਤੀ ਰਾਜਾ ਚੌਧਰੀ ਦਾ ਵੀ ਵਿਵਾਦਾਂ ਨਾਲ ਗੂੜ੍ਹਾ ਸੰਬੰਧ ਰਿਹਾ ਹੈ। ਉਹ ਅਕਸਰ ਕਿਸੇ ਨਾ ਕਿਸੇ ਲੜ੍ਹਾਈ ਕਾਰਨ ਖਬਰਾਂ 'ਚ ਬਣੇ ਰਹਿੰਦੇ ਹਨ। ਹਾਲ ਹੀ 'ਚ ਇਕ ਖਬਰ ਸਾਹਮਣੇ ਆਈ ਸੀ, ਜਿਸ ਮੁਤਾਬਕ ਰਾਜਾ ਨੇ ਆਪਣੀ ਭੋਜਪੁਰੀ ਫਿਲਮ ਦੀ ਸ਼ੂਟਿੰਗ ਦੌਰਾਨ ਕਰੂ ਮੈਂਬਰ ਨਾਲ ਹੱਥੋਪਾਈ ਕਰ ਲਈ, ਜਿਸ ਕਾਰਨ ਉਨ੍ਹਾਂ ਨੂੰ ਫਿਲਮ 'ਚੋਂ ਕੱਢ ਦਿੱਤਾ ਗਿਆ। ਉਂਝ ਇਸ ਤੋਂ ਪਹਿਲਾਂ ਰਾਜਾ ਨੇ ਸ਼ਵੇਤਾ ਦੇ ਪਤੀ ਅਭਿਨਵ ਕੋਹਲੀ ਨੂੰ ਵੀ ਥੱਪੜ ਮਾਰ ਕੇ ਸਾਰਿਆ ਨੂੰ ਹੈਰਾਨ ਕਰ ਦਿੱਤਾ ਸੀ। 

ਐਕਟਰ ਅਰਜੁਨ ਕਪੂਰ ਵੀ ਇਕ ਵਾਰ ਰੇਡੀਓ ਜੌਕੀ ਨੂੰ ਥੱਪੜ ਮਾਰ ਕੇ ਸੁਰਖੀਆਂ ਬਟੋਰ ਚੁੱਕੇ ਹਨ। ਹਾਲਾਂਕਿ ਬਾਅਦ 'ਚ ਪਤਾ ਲੱਗਾ ਸੀ ਕਿ ਇਹ ਸਭ ਇਕ ਮਜ਼ਾਕ ਸੀ।

ਆਖਿਰ 'ਚ ਗੱਲ ਕਰਾਂਗੇ ਖੂਬਸੂਰਤ ਅਦਾਕਾਰਾ ਗੌਹਰ ਖਾਨ ਦੀ। ਜ਼ਿਕਰਯੋਗ ਹੈ ਕਿ ਗੌਹਰ ਖਾਨ ਨੇ ਕਿਸੇ ਸ਼ਖਸ ਨੂੰ ਥੱਪੜਾ ਮਾਰਿਆ ਤਾਂ ਨਹੀਂ ਬਲਕਿ ਉਨ੍ਹਾਂ ਨੂੰ ਖੁਦ ਇਸ ਦਾ ਸ਼ਿਕਾਰ ਹੋਣਾ ਪਿਆ। ਅਸਲ 'ਚ ਇਕ ਸ਼ੋਅ ਦੌਰਾਨ ਦਰਸ਼ਕਾਂ 'ਚੋਂ ਇਕ ਸ਼ਖਸ ਨੇ ਉਨ੍ਹਾਂ ਕੋਲ ਆ ਕੇ ਉਨ੍ਹਾਂ ਦੇ ਜ਼ੋਰਦਾਰ ਥੱਪੜ ਮਾਰ ਦਿੱਤਾ ਸੀ।