ਥੱਪੜ ਤੋਂ ਸ਼ੁਰੂ ਹੋਈ ਸੀ ਈਸ਼ਾ ਦਿਓਲ ਤੇ ਭਰਤ ਦੀ ਲਵ ਸਟੋਰੀ, ਜਾਣੋ ਦਿਲਚਸਪ ਕਿੱਸਾ

ਜਲੰਧਰ (ਬਿਊਰੋ) — ਬਾਲੀਵੁੱਡ ਦੇ ਹੀਮੈਨ ਧਰਮਿੰਦਰ ਅਤੇ ਹੇਮਾ ਮਾਲਿਨੀ ਦੀ ਧੀ ਈਸ਼ਾ ਦਿਓਲ ਦਾ ਅੱਜ ਆਪਣਾ 37ਵਾਂ ਜਨਮਦਿਨ ਸੈਲੀਬ੍ਰੇਟ ਕਰ ਰਹੀ ਹੈ। ਅੱਜ ਉਨ੍ਹਾਂ ਦੀ ਲਵ ਸਟੋਰੀ ਬਾਰੇ ਤੁਹਾਨੂੰ ਕੁਝ ਗੱਲਾਂ ਦੱਸਾਂਗੇ। ਧਰਮਿੰਦਰ ਅਤੇ ਹੇਮਾ ਮਾਲਿਨੀ ਦੀ ਇਸ ਧੀ ਨੇ ਅਦਾਕਾਰੀ ਦੇ ਖੇਤਰ 'ਚ ਵੀ ਕਦਮ ਰੱਖਿਆ ਪਰ ਉਹ ਆਪਣੀ ਮਾਂ ਪਿਤਾ ਅਤੇ ਭਰਾਵਾਂ ਵਾਂਗ ਬਾਲੀਵੁੱਡ 'ਚ ਕੁਝ ਖਾਸ ਕਮਾਲ ਨਹੀਂ ਕਰ ਸਕੀ।

ਸਾਲ 2004 ਤੋਂ 2011 ਤੱਕ ਉਨ੍ਹਾਂ 23 ਫਿਲਮਾਂ ਕੀਤੀਆਂ, ਜਿਨ੍ਹਾਂ 'ਚ ਕੁਝ ਹਿੱਟ ਅਤੇ ਕੁਝ ਫਲਾਪ ਸਾਬਿਤ ਹੋਈਆਂ। ਸਾਲ 2012 'ਚ ਉਨ੍ਹਾਂ ਨੇ ਆਪਣੇ ਬਚਪਨ ਤੋਂ ਸਾਥੀ ਰਹੇ ਭਰਤ ਨਾਲ ਵਿਆਹ ਕਰਵਾ ਲਿਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਹਮੇਸ਼ਾ ਲਈ ਫਿਲਮਾਂ ਨੂੰ ਅਲਵਿਦਾ ਆਖ ਦਿੱਤਾ। ਈਸ਼ਾ ਹੁਣ 2 ਬੱਚੀਆਂ ਦੀ ਮਾਂ ਹੈ ਪਰ ਈਸ਼ਾ ਅਤੇ ਭਰਤ ਦੀ ਲਵ ਸਟੋਰੀ ਕਿਸੇ ਫਿਲਮੀ ਕਹਾਣੀ ਤੋਂ ਘੱਟ ਨਹੀਂ ਹੈ।

ਦੱਸਿਆ ਜਾਂਦਾ ਹੈ ਕਿ ਭਰਤ 13 ਸਾਲ ਦੀ ਉਮਰ 'ਚ ਹੀ ਈਸ਼ਾ ਨੂੰ ਦਿਲ ਦੇ ਬੈਠੇ ਸਨ। ਦੋਵਾਂ ਦੀ ਮੁਲਾਕਾਤ ਉਦੋਂ ਹੁੰਦੀ ਸੀ ਜਦੋਂ ਸਕੂਲ ਵੱਲੋਂ ਇੰਟਰ ਸਕੂਲ ਮੁਕਾਬਲਾ ਹੁੰਦਾ ਸੀ। ਮੀਡੀਆ ਰਿਪੋਰਟਸ ਮੁਤਾਬਕ ਈਸ਼ਾ ਨੇ ਦੱਸਿਆ ਸੀ ਕਿ ਭਰਤ ਨੇ ਉਨ੍ਹਾਂ ਦਾ ਹੱਥ ਉਸ ਸਮੇਂ ਫੜ੍ਹਨ ਦੀ ਕੋਸ਼ਿਸ਼ ਕੀਤੀ ਸੀ ਤਾਂ ਉਨ੍ਹਾਂ ਨੇ ਉਸ ਨੂੰ ਥੱਪੜ ਮਾਰ ਦਿੱਤਾ ਸੀ।

ਇਸ ਦੇ ਨਾਲ ਹੀ ਕਿਹਾ ਸੀ ਕਿ ਤੇਰੀ ਹਿੰਮਤ ਕਿਵੇਂ ਹੋਈ ਮੇਰਾ ਹੱਥ ਫੜ੍ਹਨ ਦੀ? ਉਸ ਸਮੇਂ ਦੋਵੇਂ ਕਿਸ਼ੋਰ ਅਵਸਥਾ 'ਚ ਸਨ। ਇਸ ਤੋਂ ਬਾਅਦ ਕਈ ਸਾਲ ਤੱਕ ਦੋਵਾਂ ਦੀ ਗੱਲਬਾਤ ਨਹੀਂ ਹੋਈ ਪਰ ਭਰਤ ਦੇ ਦਿਲ 'ਚ ਈਸ਼ਾ ਪ੍ਰਤੀ ਅਜੇ ਵੀ ਪਿਆਰ ਬਰਕਰਾਰ ਸੀ।

ਭਰਤ ਈਸ਼ਾ ਦੀ ਛੋਟੀ ਭੈਣ ਅਹਾਨਾ ਦੇ ਵੀ ਦੋਸਤ ਸਨ। 10 ਸਾਲ ਤੱਕ ਦੋਵਾਂ ਦਰਮਿਆਨ ਗੱਲਬਾਤ ਨਾ ਹੋਣ ਤੋਂ ਬਾਅਦ ਦੋਵਾਂ ਦੀ ਮੁਲਾਕਾਤ ਨਿਆਗਰਾ ਫਾਲਸ 'ਤੇ ਹੋਈ। ਉਸ ਸਮੇਂ ਭਰਤ ਨੇ ਈਸ਼ਾ ਨੂੰ ਪੁੱਛਿਆ ਸੀ ਕਿ ਉਹ ਉਨ੍ਹਾਂ ਦਾ ਹੱਥ ਫੜ੍ਹ ਸਕਦੇ ਹਨ? ਤਾਂ ਈਸ਼ਾ ਨੇ ਤੁਰੰਤ ਹਾਂ ਕਰ ਦਿੱਤੀ। ਇਹ ਸਾਰੀ ਗੱਲਬਾਤ ਈਸ਼ਾ ਨੇ ਆਪਣੀ ਮਾਂ ਹੇਮਾ ਮਾਲਿਨੀ ਨੂੰ ਦੱਸੀ ਅਤੇ ਦੋਵਾਂ ਪਰਿਵਾਰਾਂ ਦੀ ਰਜ਼ਾਮੰਦੀ ਤੋਂ ਬਾਅਦ ਦੋਵੇਂ ਵਿਆਹ ਦੇ ਬੰਧਨ 'ਚ ਬੱਝ ਗਏ।