ਮਸ਼ਹੂਰ ਗਾਇਕ ਬੀ ਪਰਾਕ ''ਤੇ ਪਿਤਾ ਨੂੰ ਬੰਧਕ ਬਣਾਉਣ ਦੇ ਦੋਸ਼, ਅਦਾਲਤ ''ਚ ਪੁੱਜਾ ਮਾਮਲਾ

ਚੰਡੀਗੜ੍ਹ/ਜਲੰਧਰ (ਬਿਊਰੋ) — ਪੰਜਾਬੀ ਗਾਇਕ ਤੇ ਮਿਊਜ਼ਿਕ ਡਰਾਇਰੈਕਟਰ ਬੀ ਪਰਾਕ ਉਰਫ ਪ੍ਰਤੀਕ ਬੱਚਨ 'ਤੇ ਆਪਣੇ ਪਿਤਾ ਨੂੰ ਘਰ 'ਚ ਨਜ਼ਰਬੰਦ ਕਰਨ ਦਾ ਦੋਸ਼ ਲੱਗਾ ਹੈ। ਬੀ ਪਰਾਕ ਦੇ ਮਿਊਜ਼ਿਕ ਡਾਇਰੈਕਟਟਰ ਪਿਤਾ ਵਰਿੰਦਰ ਬੱਚਨ ਦੀ ਹੀ ਇਕ ਸ਼ਗਿਰਦ ਨੇ ਬੀ ਬਰਾਕ ਵਲੋਂ ਪਿਤਾ ਨੂੰ ਬੰਧਕ ਬਣਾ ਕੇ ਰੱਖਣ, ਦਵਾਈ ਤੇ ਸਹੀ ਇਲਾਜ ਨਾ ਕਰਾਉਣ ਦਾ ਦੋਸ਼ ਲਾਉਂਦੇ ਹੋਏ ਪੰਜਾਬ ਐਂਡ ਹਰਿਆਣਾ ਹਾਈਕੋਰਟ 'ਚ ਯਾਚਿਕਾ ਦਾਇਰ ਕੀਤੀ ਹੈ। ਯਾਚਿਕਾ 'ਤੇ ਹਾਈਕੋਰਟ ਨੇ ਐੱਸ. ਐੱਸ. ਪੀ. ਨੂੰ ਨੋਟਿਸ ਜਾਰੀ ਕਰਕੇ ਇਸ ਬਾਰੇ 'ਚ 16 ਜੁਲਾਈ ਨੂੰ ਰਿਪੋਰਟ ਜਾਰੀ ਕਰਨ ਦੇ ਹੁਕਮ ਦਿੱਤੇ ਹਨ। ਦੱਸ ਦਈਏ ਕਿ ਬੀ ਪਰਾਕ ਬਾਲੀਵੁੱਡ ਦੇ ਐਕਸ਼ਨ ਖਿਲਾੜੀ ਦੀ ਫਿਲਮ 'ਕੇਸਰੀ' 'ਚ 'ਤੇਰੀ ਮਿੱਟੀ...' ਵਰਗੇ ਗੀਤ ਗਾ ਚੁੱਕੇ ਹਨ। ਇਸ ਤੋਂ ਇਲਾਵਾ ਉਹ ਪੰਜਾਬੀ ਸੰਗੀਤ ਜਗਤ ਨੂੰ ਵੀ ਕਈ ਹਿੱਟ ਗੀਤ ਦੇ ਚੁੱਕੇ ਹਨ।

ਇਹ ਹੈ ਪੂਰਾ ਮਾਮਲਾ 
ਵਰਿੰਦਰ ਬੱਚਨ ਦੀ ਸ਼ਿਕਾਇਤ ਕਰਤਾ ਮੀਨੂ ਕਪੂਰ ਦੇ ਵਕੀਲ ਪ੍ਰਦੀਪ ਸ਼ਰਮਾ ਨੇ ਦੱਸਿਆ ਕਿ ਪੇਸ਼ੇ ਤੋਂ ਮਿਊਜ਼ਿਕ ਡਰਾਇਰੈਕਟਰ ਵਰਿੰਦਰ ਬੱਚਨ ਚੰਡੀਗੜ੍ਹ ਦੇ ਸੈਕਟਰ 20 'ਚ ਰਹਿੰਦੇ ਹਨ। ਵਰਿੰਦਰ ਬੱਚਨ ਦੀ ਸਿਹਤ ਕਾਫੀ ਸਮੇਂ ਤੋਂ ਖਰਾਬ ਹੈ। ਉਨ੍ਹਾਂ ਦੇ ਦਿਮਾਗ 'ਚ ਖੂਨ ਜੰਮਣਾ ਸ਼ੁਰੂ ਹੋ ਗਿਆ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ। ਮੀਨੂ ਮੁਤਾਬਕ, ਵਰਿੰਦਰ ਦੀ ਪਤਨੀ ਤੇ ਬੇਟਾ ਉਨ੍ਹਾਂ ਦਾ ਸਹੀ ਤਰੀਕੇ ਨਾਲ ਇਲਾਜ ਨਹੀਂ ਕਰਵਾ ਰਿਹਾ ਅਤੇ ਨਾ ਹੀ ਉਨ੍ਹਾਂ ਨੂੰ ਕਿਸੇ ਨਾਲ ਮਿਲਣ ਦਿੰਦੇ ਹਨ। ਵਰਿੰਦਰ ਦੀ ਜੀਕਰਪੁਰ ਤੇ ਚੰਡੀਗੜ੍ਹ 'ਚ ਜਾਇਦਾਦ ਹੈ। ਉਸ ਜਾਇਦਾਦ ਨੂੰ ਉਨ੍ਹਾਂ ਦੀ ਪਤਨੀ ਤੇ ਬੇਟਾ ਬੀ ਪਰਾਕ ਹੜਪਨਾ ਚਾਹੁੰਦਾ ਹੈ।

ਮਈ 'ਚ ਵਰਿੰਦਰ ਬੱਚਨ ਨੇ ਕੀਤੀ ਸੀ ਪੁਲਸ 'ਚ ਸ਼ਿਕਾਇਤ
ਵਕੀਲ ਪ੍ਰਦੀਪ ਸ਼ਰਮਾ ਨੇ ਦੱਸਿਆ ਕਿ ਵਰਿੰਦਰ ਬੱਚਨ ਨੇ ਮਈ 'ਚ ਪੁਲਸ ਨੂੰ ਸ਼ਿਕਾਇਤ ਕੀਤੀ ਸੀ ਪਰ ਕੋਈ ਸਖਤ ਕਾਰਵਾਈ ਨਹੀਂ ਕੀਤੀ ਗਈ। ਪੁਲਸ ਘਰ 'ਚ ਆਈ ਅਤੇ ਪਰਿਵਾਰ ਨੂੰ ਉਨ੍ਹਾਂ ਦਾ ਇਲਾਜ ਕਰਵਾਉਣ ਦੀ ਗੱਲ ਕਹਿੰਦੇ ਹੋਏ ਰੋਕ-ਟੋਕ ਨਾ ਲਾਉਣ ਦੀ ਸਲਾਹ ਦੇ ਕੇ ਚੱਲੀ ਗਈ ਪਰ ਮੀਨੂ ਮੁਤਾਬਕ, ਪੁਲਸ ਆਉਣ ਦੇ ਬਾਵਜੂਦ ਵੀ ਉਨ੍ਹਾਂ ਦੀ ਪਤਨੀ ਤੇ ਬੇਟੇ ਦਾ ਰੱਵਾਈਆ ਨਹੀਂ ਬਦਲਿਆ। ਹਾਈਕੋਰਟ ਨੇ ਮਾਮਲੇ ਨੂੰ ਸਖਤੀ ਨਾਲ ਲੈਂਦੇ ਹੋਏ ਐੱਸ. ਐੱਸ. ਪੀ. ਨੂੰ ਇਸ ਮਾਮਲੇ 'ਤੇ 16 ਜੁਲਾਈ ਤੱਕ ਵਿਸ਼ੇਸ਼ ਰਿਪੋਰਟ ਪੇਸ਼ ਕਰਨ ਦੇ ਹੁਕਮ ਦਿੱਤੇ ਹਨ।