ਨਮ ਅੱਖਾਂ ਨਾਲ ਰਵੀ ਕਿਸ਼ਨ ਨੇ ਪਿਤਾ ਨੂੰ ਦਿੱਤੀ ਅੰਤਿਮ ਵਿਦਾਈ, ਕਿਹਾ ''ਅੱਜ ਮੈਂ ਇਕੱਲਾ ਹੋ ਗਿਆ ਹਾਂ''

ਮੁੰਬਈ (ਬਿਊਰੋ) — ਭੋਜਪੁਰੀ ਸਿਨੇਮਾ ਦੇ ਸੁਪਰਸਟਾਰ ਤੇ ਗੋਰਖਪੁਰ ਦੇ ਭਾਜਪਾ ਸਾਂਸਦ ਰਵੀ ਕਿਸ਼ਨ ਦੇ ਪਿਤਾ ਦਾ ਦਿਹਾਂਤ ਮੰਗਲਵਾਰ ਦੇਰ ਰਾਤ ਹੋਇਆ ਸੀ। ਰਵੀ ਕਿਸ਼ਨ ਦੇ ਪਿਤਾ ਸ਼ਯਾਮ ਨਾਰਾਇਣ ਸ਼ੁਕਲ ਨੇ ਵਾਰਾਣਸੀ 'ਚ ਅੰਤਿਮ ਸਾਹ ਲਿਆ। ਬੁੱਧਵਾਰ ਦੁਪਿਹਰ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਮਣੀਕਰਣਿਕਾ ਘਾਟ 'ਤੇ ਕੀਤਾ ਗਿਆ।

ਪਿਤਾ ਦੀ ਅੰਤਿਮ ਵਿਦਾਈ ਦੌਰਾਨ ਰਵੀ ਕਿਸ਼ਨ ਕਾਫੀ ਭਾਵੁਕ ਹੋ ਗਏ ਸਨ। ਪਿਤਾ ਦੇ ਦਿਹਾਂਤ 'ਤੇ ਰਵੀ ਕਿਸ਼ਨ ਨੇ ਕਿਹਾ, ''ਇਹੀ ਸਾਡੀ ਦੁਨੀਆ ਸਨ, ਅੱਜ ਉਹ ਨਾਲ ਨਹੀਂ ਹਨ। ਮੇਰਾ ਕੋਈ ਗੁਰੂ ਨਹੀਂ ਸੀ। ਨਾ ਹੀ ਮੈਂ ਭਗਵਾਨ ਨੂੰ ਦੇਖਿਆ ਹੈ। ਹੁਣ ਤੱਕ ਸਭ ਕੁਝ ਪਿਤਾ ਨੇ ਹੀ ਮੈਨੂੰ ਸਾਖਾਇਆ ਹੈ। ਉਹ ਮੇਰੇ ਗੁਰੂ ਵੀ ਸਨ ਤੇ ਭਗਵਾਨ ਵੀ। ਅੱਜ ਮੈਂ ਬਹੁਤ ਇਕੱਲਾ ਹੋ ਗਿਆ ਹਾਂ। ਉਹ ਦੋ ਮਹੀਨੇ ਤੋਂ ਬੀਮਾਰ ਸਨ। ਅੱਜ ਮੇਰੇ ਸਿਰ ਤੋਂ ਵੱਡਾ ਸਾਇਆ ਉੱਠ ਗਿਆ ਹੈ। 

ਦੱਸਣਯੋਗ ਹੈ ਕਿ ਰਵੀ ਕਿਸ਼ਨ ਦੇ ਪਿਤਾ ਦਾ ਇਲਾਜ ਪਿਛਲੇ ਕਈ ਮਹੀਨਿਆਂ ਤੋਂ ਮੁੰਬਈ 'ਚ ਚੱਲ ਰਿਹਾ ਸੀ। ਹਾਲਾਂਕਿ ਸਿਹਤ 'ਚ ਕੋਈ ਸੁਧਾਰ ਨਹੀਂ ਹੋ ਰਿਹਾ ਸੀ।