ਬੇਹੱਦ ਸੰਘਰਸ਼ ਭਰੀ ਹੈ ਹੈਲੇਨ ਦੀ ਜ਼ਿੰਦਗੀ, ਜਾਣੋ ਗਲੈਮਰ ਤੇ ਮੁਸਕਰਾਹਟ ਪਿੱਛੇ ਲੁਕੇ ਇਸ ਦਰਦ ਨੂੰ

ਮੁੰਬਈ (ਬਿਊਰੋ) — 50 ਦੇ ਦਹਾਕੇ ਦੀਆਂ ਫਿਲਮਾਂ 'ਚ ਹੀਰੋ ਦੇ ਬਰਾਬਰ ਵਿਲੇਨ ਵੀ ਦਿਖਾਈ ਦੇਣ ਲੱਗੇ ਸਨ। ਅਜਿਹੇ 'ਚ ਫਿਲਮਾਂ 'ਚ ਕਮੀ ਸੀ ਤਾਂ ਉਹ ਗਲੈਮਰ ਦੀ ਸੀ। ਇਸ ਕਮੀ ਨੂੰ ਦੂਰ ਕੀਤਾ ਆਈਟਮ ਨੰਬਰ ਨੇ, ਜਿਸ ਦੀ ਸ਼ੁਰੂਆਤ ਹੈਲੇਨ ਨੇ ਕੀਤੀ ਸੀ।

ਹੈਲਨ ਦੇ ਡਾਂਸ ਅਤੇ ਗਲੈਮਰ ਨੂੰ ਦੇਖ ਕੇ ਹਰ ਇਕ ਦੀਆਂ ਨਜ਼ਰਾਂ ਠਹਿਰ ਜਾਂਦੀਆਂ ਸਨ ਪਰ ਹੈਲੇਨ ਦੇ ਗਲੈਮਰ ਤੇ ਮੁਸਕਰਾਹਟ ਪਿੱਛੇ ਕੀ ਦਰਦ ਛੁਪਿਆ ਹੋਇਆ ਹੈ ਇਹ ਕੋਈ ਨਹੀਂ ਜਾਣਦਾ। ਹੈਲੇਨ ਦਾ ਜਨਮ 21 ਨਵੰਬਰ 1938 'ਚ ਹੋਇਆ ਸੀ। ਉਨ੍ਹਾਂ ਦੀ ਮਾਂ ਬਰਮਾ ਦੀ ਰਹਿਣ ਵਾਲੀ ਸੀ। ਉਨ੍ਹਾਂ ਦਾ ਇਕ ਭਰਾ ਤੇ ਇਕ ਮਤਰੇਈ ਭੈਣ ਸੀ।

ਪਿਤਾ ਦੀ ਮੌਤ ਤੋਂ ਬਾਅਦ ਮਾਂ ਨੇ ਛੱਡ ਦਿੱਤਾ ਸੀ ਸਾਥ
ਪਿਤਾ ਦੇ ਦਿਹਾਂਤ ਤੋਂ ਬਾਅਦ ਹੈਲੇਨ ਦੀ ਮਾਂ ਨੇ ਇਕ ਬਰਤਾਨਵੀਂ ਫੌਜੀ ਨਾਲ ਵਿਆਹ ਕਰਵਾ ਲਿਆ ਸੀ ਪਰ ਵਰਲਡ ਵਾਰ 2 ਦੌਰਾਨ ਮਤਰੇਏੇ ਪਿਤਾ ਦੀ ਮੌਤ ਵੀ ਹੋ ਗਈ ਸੀ। ਜਦੋਂ ਜਪਾਨ ਨੇ ਬਰਮਾ ਤੇ ਹਮਲਾ ਕੀਤਾ ਤਾਂ ਹੈਲੇਨ ਦਾ ਪੂਰਾ ਪਰਿਵਾਰ ਮੁੰਬਈ ਆ ਗਿਆ।

ਨਰਸ ਦੀ ਕਰ ਚੁੱਕੀ ਹੈ ਨੌਕਰੀ
ਮੁੰਬਈ ਆਉਣ ਤੋਂ ਪਹਿਲਾਂ ਹੈਲੇਨ ਦਾ ਪੂਰਾ ਪਰਿਵਾਰ ਕੋਲਕਾਤਾ ਠਹਿਰ ਗਿਆ। ਇੱਥੇ ਹੈਲੇਨ ਦੀ ਮਾਂ ਨਰਸ ਦਾ ਕੰਮ ਕਰਨ ਲੱਗੀ ਪਰ ਉਸ ਦੀ ਨੌਕਰੀ ਨਾਲ ਘਰ ਦਾ ਗੁਜਾਰਾ ਨਹੀਂ ਸੀ ਚੱਲਦਾ। ਇਸ ਦੌਰਾਨ ਹੈਲੇਨ ਤੇ ਉਸ ਦੀ ਮਾਂ ਦੀ ਮੁਲਾਕਾਤ ਕੁੱਕੂ ਮੋਰੇ ਨਾਲ ਹੋਈ। ਕੁੱਕੂ ਫਿਲਮਾਂ 'ਚ ਬੈਕਗਰਾਊਂਡ ਡਾਂਸਰ ਸੀ।

ਕੁੱਕੂ ਦਾ ਚਾਰਮ ਪਾਇਆ ਫਿੱਕਾ
ਹੈਲੇਨ ਦੇ ਆਉਂਦੇ ਹੀ ਕੁੱਕੂ ਦਾ ਚਾਰਮ ਫਿੱਕਾ ਪੈ ਗਿਆ ਤੇ ਹੈਲੇਨ ਨੇ ਆਪਣੀ ਜਗ੍ਹਾ ਬਣਾ ਲਈ। 19 ਸਾਲ ਦੀ ਉਮਰ 'ਚ ਹੈਲੇਨ ਨੂੰ ਫਿਲਮ ਹਾਵੜਾ ਬ੍ਰਿਜ 'ਚ ਵੱਡਾ ਬਰੇਕ ਮਿਲਿਆ। ਇਸ ਫਿਲਮ ਦੇ ਗੀਤ 'ਮੇਰਾ ਨਾਮ ਚਿਨ ਚਿਨ' ਨੇ ਹੈਲੇਨ ਦੀ ਕਿਸਮਤ ਬਦਲ ਦਿੱਤੀ ਤੇ ਉਹ ਹਿੰਦੀ ਫਿਲਮਾਂ ਦੀ ਨੰਬਰ ਵਨ ਆਈਟਮ ਨੰਬਰ ਬਣ ਗਈ।

ਖੂਬਸੁਰਤੀ ਲਈ ਵੀ ਜਾਣੇ ਜਾਂਦੇ ਸਨ
ਹੈਲੇਨ ਆਪਣੀ ਖੂਬਸੁਰਤੀ ਕਰਕੇ ਜਾਣੀ ਜਾਂਦੀ ਸੀ। ਜਦੋਂ ਵੀ ਉਹ ਘਰ ਤੋਂ ਬਾਹਰ ਨਿਕਲਦੀ ਤਾਂ ਉਹ ਬੁਰਕਾ ਪਾ ਕੇ ਨਿਕਲਦੀ। 1957 'ਚ ਉਸ ਨੇ ਡਾਇਰੈਕਟਰ ਪੀ. ਐੱਨ. ਅਰੋੜਾ ਨਾਲ ਵਿਆਹ ਕਰ ਲਿਆ ਪਰ 16 ਸਾਲ ਦਾ ਇਹ ਵਿਆਹ ਹੈਲੇਨ ਦੇ 35ਵੇਂ ਜਨਮ ਦਿਨ ਤੇ ਟੁੱਟ ਗਿਆ ਕਿਉਂਕਿ ਪੀ. ਐੱਨ. ਅਰੋੜਾ ਹੈਲੇਨ ਦੀ ਕਮਾਈ ਸ਼ਰਾਬ 'ਚ ਉਡਾਉਂਦਾ ਸੀ ਤੇ ਹੈਲੇਨ ਦਿਵਾਲੀਆ ਹੋ ਗਈ ਸੀ।

ਮੁਸ਼ਕਿਲ ਦੀ ਘੜੀ ਸਲੀਮ ਖਾਨ ਨੇ ਫੜ੍ਹੀ ਬਾਹ
ਮੁਸ਼ਕਿਲ ਦੀ ਇਸ ਘੜੀ 'ਚ ਸਾਲ 1962 ਫਿਲਮ 'ਕਾਬਿਲ ਖਾਨ' ਦੌਰਾਨ ਹੈਲੇਨ ਦੀ ਮੁਲਾਕਾਤ ਸਲੀਮ ਖਾਨ ਨਾਲ ਹੋਈ। ਉਨ੍ਹਾਂ ਨੇ ਹੈਲੇਨ ਦੀ ਪੂਰੀ ਮਦਦ ਕੀਤੀ। ਸਲੀਮ ਨੇ ਵਿਆਹੇ ਹੋਣ ਦੇ ਬਾਵਜੂਦ ਹੈਲੇਨ ਨਾਲ ਵਿਆਹ ਕਰਵਾਇਆ। ਹੈਲੇਨ ਨੂੰ ਫਿਲਮਾਂ 'ਚ ਦਿੱਤੇ ਯੋਗਦਾਨ ਕਰਕੇ 'ਪਦਮਸ਼੍ਰੀ' ਤੇ 'ਫਿਲਮਫੇਅਰ ਐਵਾਰਡ' ਨਾਲ ਨਿਵਾਜਿਆ ਜਾ ਚੁੱਕਿਆ ਹੈ।